Sicrhau Llwyddiant: Prosiect AnTir Sir Gaerfyrddin
Written by Tir Coed / Dydd Mawrth 20 Chwefror 2024
Mae'n bleser gan Tir Coed gyhoeddi ei lwyddiant diweddar wrth sicrhau cyllid i gyflawni Prosiect AnTir Sir Gaerfyrddin yn 2023/24.
Mae Prosiect AnTir Sir Gaerfyrddin wedi derbyn £171,968 gan Lywodraeth y DU drwy Gronfa Ffyniant Gyffredin y DU, gyda chefnogaeth Cyngor Sir Caerfyrddin. Bydd y prosiect hwn yn galluogi Tir Coed i ddarparu cyrsiau sgiliau coetir, natur, tyfu bwyd a sgiliau treftadaeth, sesiynau blasu a chyfleoedd gwirfoddoli ledled Sir Gaerfyrddin.
Bydd y ddarpariaeth yn cynnig sgiliau penodol i weithwyr, dysgu achrededig a phrofiad sy'n berthnasol ar gyfer swyddi gwyrdd, ac yn cynnwys mentora, cyngor ac arweiniad un-i-un, gan gefnogi dilyniant sy'n canolbwyntio ar yr unigolyn tuag at fwy o ymgysylltu economaidd a chymunedol.
Bydd y gwaith ymarferol a wneir yn ystod Prosiect AnTir Sir Gaerfyrddin yn gwella mannau cymunedol a bioamrywiaeth er budd pawb.
Dywedodd y Cyfarwyddwr Gweithrediadau, Cath Seymour: "Mae hyn yn newyddion gwych ar gyfer dyfodol Tir Coed yn Sir Gaerfyrddin. Mae'n golygu y gallwn barhau i gefnogi pobl dan anfantais, cynnig hyfforddiant wedi'i dargedu'n well i'r rhai sy'n dyheu am symud ymlaen i swyddi awyr agored neu wirfoddoli, a gwella mannau cymunedol at les pawb. Mae'n golygu y gallwn gyfrannu ein rhan fach wrth ymateb i heriau allweddol sy'n wynebu pobl Sir Gaerfyrddin, wrth helpu cymunedau lleol i ddod yn fwy gwydn."
Os hoffech gael gwybod mwy am Brosiect AnTir Sir Gaerfyrddin, a chael gwybod sut i gymryd rhan, cysylltwch â: [email protected].
Mae Cronfa Ffyniant Gyffredin y DU yn brif biler agenda Hybu Ffyniant Bro llywodraeth y DU ac mae’n darparu £2.6 biliwn o gyllid ar gyfer ei fuddsoddi’n lleol erbyn Mawrth 2025. Nod y Gronfa yw gwella balchder mewn lle a chynyddu cyfleoedd bywyd ar draws y DU, buddsoddi mewn cymunedau a lle, gan gynorthwyo busnesau lleol, a phobl a sgiliau. I gael rhagor o wybodaeth, ewch i
https://www.gov.uk/government/...
Mae Sir Gaerfyrddin wedi derbyn tua £38 miliwn i ymateb i anghenion lleol a nodwyd yn y Cynllun Buddsoddi Lleol yn ogystal â strategaethau datblygu ac adfer economaidd lleol eraill. Mae rhaglen Cronfa Ffyniant Gyffredin Sir Gaerfyrddin yn cael ei rheoli a'i chyflwyno gan Gyngor Sir Caerfyrddin gydag arweiniad a chefnogaeth gan Bartneriaeth Adfywio leol sy'n cynnwys sefydliadau cyhoeddus, preifat a'r trydydd sector. Am ragor o wybodaeth am raglen Cronfa Ffyniant Gyffredin Sir Gaerfyrddin, ewch i
https://www.sirgar.llyw.cymru/...
