Cyllid “achubiaeth” wedi'i sicrhau ar gyfer Tir Coed
Written by Tir Coed / Dydd Mercher 18 Ionawr 2023
Mae cyfraniad o £123,094 tuag at Brosiect AnTir Sir Gaerfyrddin a Sir Benfro a £93,630 tuag at AnTir Ceredigion a Phowys yn galluogi’r elusen ddysgu a lles i weithio gyda dros 1000 o bobl i wella coetiroedd, gerddi cymunedol a mannau sy’n agored i’r cyhoedd ar gyfer natur a chymunedau lleol, wrth wella hyder a sgiliau cyfranogwyr a dyfarnu unedau achrededig.
Mae AnTir yn ehangu darpariaeth coetir Tir Coed i gynnwys tyfu bwyd sy’n gyfeillgar i natur, arferion adfywio fel adfer perthi, dolydd neu berllannau - a sgiliau treftadaeth ehangach.
Dywedodd y Cyfarwyddwr Gweithrediadau Cath Seymour: “Mae hyn yn newyddion gwych - ac yn achubiaeth wirioneddol i Tir Coed! Mae’n golygu y gallwn barhau i gefnogi pobl ddifreintiedig, gan hyfforddi’r rheini sy'n dymuno symud ymlaen i swyddi neu wirfoddoli yn yr awyr agored, a gwella mannau cymunedol er budd pawb. Mae’n golygu ein bod ni’n gallu cyfrannu ein rhan fach ni i helpu cymunedau lleol i ddod yn fwy gwydn – yn wyneb newid hinsawdd, yr argyfwng natur, heriau iechyd corfforol a meddyliol a nawr yr argyfwng costau byw hefyd!”
Er bod angen i Tir Coed godi rhagor o arian i gyflawni’r prosiect AnTir uchelgeisiol, mae Cath yn dweud bod cyllid grant CNC yn gwneud eu targedau “yn llawer mwy cyraeddadwy.”
Dywedodd Sarah Coakham, Uwch Swyddog (Cyllid) Tîm Pobl a Lleoedd CNC, Canolbarth Cymru, “Rydym yn falch iawn o fod yn gweithio gyda Tir Coed ar y prosiect hwn, gan gysylltu pobl â’u hamgylchedd wrth gynyddu sgiliau, gwella iechyd, lles a’r amgylchedd. Bydd y Grant Cymunedau Gwydn yn rhoi’r cyfleoedd i gymunedau adfer a gwella byd natur yn eu hardaloedd lleol, yn enwedig yng nghymunedau mwyaf difreintiedig Cymru a’r rhai nad oes ganddynt fawr ddim mynediad at natur, gan ein helpu ni i gyd i ymateb i heriau’r argyfwng hinsawdd a gwrthdroi’r dirywiad mewn bioamrywiaeth.”
