Gwirfoddolwyr yn ffynnu ar gyrsiau garddio Tir Coed
Written by Tir Coed / Dydd Gwener 13 Mai 2022
Rydym eisoes wedi cyrraedd canol ein cyrsiau Tyfu Organig a Garddio Bywyd Gwyllt ac yn dilyn egwyl dros y Pasg, mae ein dau grŵp yn ôl yn y gerddi mor frwdfrydig ag erioed.
Mae’r ardd yn Llanfarian lle mae’r hyfforddeion Garddio Bywyd Gwyllt yn torchi llewys yn dechrau egino – mae’r blodau gwyllt wedi llamu ymlaen, gyda charped o flodau’r neidr, ffacbys a meillion yn dechrau blodeuo. Mewn rhannau eraill mae’r clychau’r gog cynhenid wedi eu gwasgaru o gwmpas y gwrychoedd a chyrion y coetir ac mae’r rhain, ynghyd â’r coed sy’n blodeuo yn denu diddordeb nifer fawr o beillwyr yn yr ardd.
Bu creu pwll bach yn ychwanegiad gwych at y safle, yn arbennig am fod ein hyfforddeion yn dysgu am fanteision pyllau a ffynonellau dŵr eraill i fywyd gwyllt. O fewn ychydig wythnosau mae’r pwll wedi trawsnewid o flaen ein llygaid ac mae’n awr yn ferw o fywyd, gyda chwilod dŵr a phenbyliaid yn chwilio am y mannau cysgodol ar ddyddiau heulog, cynnes.
Erbyn hyn mae gan ein hyfforddeion rywbeth i edrych ymlaen ato wrth i ni dynnu’r menig garddio a gadael y rhawiau er mwyn cael defnyddio llifiau a morthwylion i lunio blychau adar ac ystlumod ar gyfer y safle. Bydd y rhain yn cael eu gosod ar y coed mwyaf, aeddfed, yn agos at y fynedfa i’r ardd a gobeithio y byddant yn denu ystlumod ac adar bach fel y titw mawr a’r titw tomos las i nythu. Dyma’r tro cyntaf i rai o’r grŵp ddefnyddio offer llaw - fel Hina, sydd wedi cymryd at y gwaith yn naturiol a dysgu’n rhwydd, a Ruby, sydd wrth ei bodd yn dysgu sgiliau newydd ac wedi mwynhau bod yn saer am y diwrnod. Rydym yn siŵr y bydd yr ystlumod a’r adar yn gwerthfawrogi eu hymdrechion a’u cartrefi newydd hefyd.
Dyma’r amser o’r flwyddyn pan fydd ychydig o law a rhywfaint o heulwen yn gweld pethau’n tyfu’n gyflym iawn, felly rydym i gyd yn edrych ymlaen at gael gweld beth fydd yr ardd yn ei gynnig i ni'r wythnos nesaf.
