Tystysgrifau a chacen ar ddiwedd y cwrs
Written by Tir Coed / Dydd Mercher 16 Mawrth 2022
Cofnododd hyfforddai a oedd yn cymryd rhan yng nghwrs Rheolaeth Coetiroedd Cynaliadwy Tir Coed yn Sir Gaerfyrddin ddiwedd eu cwrs 12 wythnos gyda thystysgrifau a chacen yn ddiweddar.
Er gwaethaf y glaw, roedd y diwrnod yn ddathliad o waith caled y rhai a gymerodd ran ac roedd yna ymdeimlad cadarnhaol a balchder yn y cynnydd a wnaed.
“Mae’r cwrs wedi bod yn aruthrol,” meddai Kathy, o Fynydd Cerrig. “Fe wnes i fwynhau bob munud ohono.
“Roedd cael pwrpas i fod allan yn yr awyr agored a gwneud rhywbeth yn hytrach na dim ond mynd am dro yn ardderchog.
“Mae cymryd rhan yn y cwrs wedi fy helpu i gryfhau a dod yn fwy heini yn ogystal â’m dysgu sut i reoli’r tir. Mae wir wedi helpu i roi hwb i fy hyder.
“Nawr rwy’n edrych ymlaen yn fawr iawn at gymryd rhan yn yr Wythnos Ddilyniant a’r Cwrs Haf.”
Ychwanegodd Leann, mam sengl o Drimsaran: “Dw i ddim wedi gwneud unrhyw beth fel hyn ers dros 20 mlynedd ac mae hi wedi bod yn braf iawn cael bod y tu allan a gwneud rhywbeth i fi fy hun.
“Mae Ben a Peter y tiwtoriaid wedi bod yn ardderchog. Maen nhw mor wybodus a bob amser yn hapus i helpu. Fe wnaethon nhw ein hannog i drafod pethau newydd a bod yn greadigol. Mae wedi bod yn wych.
“Dw i wirioneddol wedi mwynhau’r cwrs ac alla i ddim aros i ddechrau’r un nesaf.”
Mae Daniel, o Bontiets, wedi penderfynu dilyn trywydd newydd yn ei fywyd wedi cymryd rhan.
“Mae’r cwrs wedi bod yn dda dros ben. Mae’n wir ddrwg gyda fi ei fod wedi gorffen,” meddai.
“Rydw i wedi dysgu cymaint o bethau newydd ac mae’r cwrs wedi fy helpu i ddeall y cyfleoedd sydd ar gael yn y maes yma.
“Rydw i wedi dod i ddeall cymaint mwy am ochr byd natur a’r amgylchedd. Dyma beth rydw i eisiau ei wneud nawr.
“Rwy’n bendant yn edrych i ddechrau gyrfa ym maes rheoli coetiroedd neu faes cysylltiedig.”
Mae Chris, sy’n dod o Llanpumpsaint, yn un arall sy’n siomedig o weld y cwrs yn dod i ben.
“Dod i wybod am y cwrs wnes i wedi i fy ngwraig weld erthygl yng nghylchlythyr y plwyf ac awgrymodd y dylen i roi cynnig arni. Rydw i mor falch ’mod i wedi gwneud hynny achos rydw i wedi cael amser wrth fy modd,” meddai.
“Roedd y pynciau a drafodwyd ar y cwrs yn hynod ddiddorol ac rwyf wedi mwynhau gweithio allan yn yr awyr agored.
“Mae gan Ben a Peter wybodaeth dda iawn ac maent bob amser yn barod i helpu.
“Rydw i wedi dweud wrthyn nhw eisoes i fy nghofrestru i ar gyfer pa gwrs bynnag sydd gan Tir Coed ar y gweill.”
