Charlie yn rhannu ei angerdd am yr awyr agored
Written by Tir Coed / Dydd Llun 01 Tachwedd 2021
Mae Charlie Pinnegar wedi ymuno â Tir Coed fel ein cydlynydd newydd yng Ngheredigion
Dywedwch rywbeth bach am eich hun...
Rydw i wedi byw yng Nghanolbarth Cymru ers bron 30 mlynedd, gan dreulio’r 20 mlynedd diwethaf yn byw mewn bwthyn bach sydd wedi’i leoli mewn coetir bach heb drydan a nwy o’r prif gyflenwad, lle rwyf yn dal i fod yn ymdrechu i ddod hyd yn oed yn fwy hunangynhaliol.
Beth yw eich diddordebau?
Rwy’n caru’r fistâu a’r golygfeydd o’r bryniau a’r mynyddoedd, rwyf hefyd yn caru archwilio’r cymoedd coediog yn ogystal â cherdded ar hyd rhostiroedd anial.
Rydw i hefyd yn mwynhau amrywiaeth o weithgareddau awyr agored, gan gynnwys caiacio, pysgota, garddio a ffotograffiaeth – bues i’n canolbwyntio ar dynnu lluniau o fadarch a ffyngau yr Hydref hwn.
Beth yw eich hoff beth am fod allan yn yr awyr agored?
Mae byw a theimlo’n agos at natur yn bwysig i mi oherwydd yr hyn sydd ganddi i’w gynnig o ran hamdden, gwaith, llesiant a chanlyniadau therapiwtig.
Beth sy’n eich cyffroi chi fwyaf am eich rôl newydd?
Mae bod yn rhan o Tir Coed yn rhoi’r ymdeimlad i mi fy mod yn rhan o’r ateb, o ran rhannu syniadau a gweithgareddau amgylcheddol-gynaliadwy, yn ogystal â rhoi cyfleoedd i bobl a’u hannog nhw i gymryd rhan.
Pa un yw eich hoff dymor a pham?
Fy hoff dymor? Mae gan bob un ohonynt rywbeth i’w gynnig, felly ni allaf benderfynu.
Pe baech yn goeden, pa goeden fyddech chi a pham?
Rwy’n credu mai’r dderwen hynaf yn y goedwig fyddwn i oherwydd mi fyddwn i’n rhoi cartref da i amrywiaeth eang o fywyd gwyllt.
