Prosiect Mainc Atgofion Powys
Written by Tir Coed / Dydd Mercher 02 Mehefin 2021
Yntydi’n rhyfeddol sut mae ffawd yn gwneud i gynllun ddisgyn i’w le?
Ar ymweliad â Safle gan yr Ymddiriedolaeth Genedlaethol y gwelais i’r meinciau atgofion cyntaf a meddwl eu bod yn syniad gwych. Mae’r prosiect yn galluogi gofalwyr a’r bobl y maent yn gofalu amdanynt i gerfio eu hatgofion o Gwm Elan a’r awyr agored ar feinciau sydd wedyn yn cael eu selio i greu teyrnged barhaol.
Roeddwn yn arbennig o awyddus i redeg y prosiect hwn ar ôl i’m tad gael diagnosis dementia, ac rwy’n gobeithio, trwy gymryd rhan yn y gweithgaredd hwn, y bydd yn rhoi cyfle i bobl greu atgofion cadarnhaol i’w dwyn i gof.
Ar ôl i mi esbonio’r cysyniad, roedd Anna, y trefnydd sirol, yn barod iawn i mi weithio ar geisiadau am gyllid i ariannu’r prosiect.
Yna fe ddaeth Covid ac fe wnaeth y cyfnod clo i’r holl syniad ymddangos fel breuddwyd wag.
Dewch ymlaen i Ragfyr 2020 a’r newyddion cyffrous bod fy nghais am arian wedi bod yn llwyddiannus ac roedd y prosiect yn mynd i ddigwydd. A dyna lle mae ffawd yn dod i’r stori, fe gawsom y newyddion hefyd bod coed ynn aeddfed ar Stad Elan i gael eu torri. Arweiniodd taith i weld Ymddiriedolaeth Elan at eu penderfyniad caredig i roi’r coed oedd arnom eu hangen ar gyfer y prosiect.
Ar 1 Ebrill yr aeth y coed i’r felin lifio ac ymunodd y cwmni newydd lleol, ‘Made By Hand’, â ni yng Nghwm Elan i lifio’r coed yr oeddem wedi eu dethol.
Ar ôl dechrau araf wrth osod eu Melin Alascaidd, o’r diwedd roeddem yn mynd ar garlam a chafwyd 18 ystyllen o dri darn o onnen. Roedd pob slab gwyrdd yn pwyso rhwng 70-90kg ac roeddem yn ddiolchgar dros ben i Anna, Phil, Darrel a rhai o breswylwyr y pentref am eu help yn eu symud.
Rwy’n falch iawn o ddweud y byddwn yn cynnal ein dyddiau cerfio ddiwedd Gorffennaf a dechrau Awst, felly cysylltwch â mi drwy e-bostio [email protected] os ydych yn adnabod rhywun a fyddai’n cael budd o gymryd rhan yn y prosiect hwn.
