Glasu Sir Gaerfyrddin Trwy Blannu Coed a Gosod Gwrychoedd
Written by Tir Coed / Dydd Llun 15 Ebrill 2024
Yn ddiweddar, fe wynebodd tîm penderfynol iawn o hyfforddeion Tir Coed y gwaethaf o dywydd Sir Gaerfyrddin i ddysgu set eang o sgiliau newydd, ac fe gawson nhw eu gwobrwyo ag ychydig o heulwen brin i edmygu ffrwyth eu llafur.
Wrth blygu cloddiau gyda Tir Coed, mae’n rhaid gwneud eich morthwylion pren eich hun, felly treuliwyd y diwrnod cyntaf yn y tŷ crwn, cyn i’r hyfforddeion brofi eu gwaith llaw y diwrnod canlynol yn curo polion i mewn (a byddwch yn falch o glywed eu bod i gyd wedi pasio gyda seren aur).
Yna fe aethon nhw ati i blygu clawdd oedd wedi gordyfu ar fferm leol, gan ddefnyddio technegau traddodiadol. Yn ddi-ofn wrth daclo’r clawdd a'r mwd, fe wnaethon nhw waith anhygoel, ac maen nhw i gyd yn edrych ymlaen at ddychwelyd i weld y clawdd unwaith y bydd wedi dechrau tyfu.
Er eu bod yn dioddef ar ôl plygu clawdd, fel unrhyw dîm da o hyfforddeion Tir Coed, roedden nhw’n awyddus i ddysgu mwy o sgiliau, felly’r diwrnod canlynol fe wnaethon nhw ailblannu ardal o goetir a oedd wedi’i chlirio’n ddiweddar ym Mharc Gwledig Llyn Llech Owain. Yn cymryd lle’r coed coniffer a gwympwyd oedd amrywiaeth o goed llydanddail brodorol, felly dysgodd yr hyfforddeion sut, pam, ble a phryd i blannu gwahanol rywogaethau o goed.
Prif fantais cael caniatâd i blannu yn Llyn Llech Owain yw y gallem, ar ddiwedd y dydd, i gyd eistedd yn y Caffi gyda mẁg o de, darn o gacen siocled haeddiannol, a ffrindiau newydd. Roedd yn gyfle i fyfyrio ar wythnos wych, ac edrych ymlaen at ddefnyddio ein sgiliau newydd yn y dyfodol.
Ariennir y prosiect hwn gan Lywodraeth y DU trwy Gronfa Ffyniant Gyffredin y DU.
Mae Cronfa Ffyniant Gyffredin y DU yn brif biler agenda Hybu Ffyniant Bro llywodraeth y DU ac mae’n darparu £2.6 biliwn o gyllid ar gyfer ei fuddsoddi’n lleol erbyn Mawrth 2025. Nod y Gronfa yw gwella balchder mewn lle a chynyddu cyfleoedd bywyd ar draws y DU, buddsoddi mewn cymunedau a lle, gan gynorthwyo busnesau lleol, a phobl a sgiliau. I gael rhagor o wybodaeth, ewch i
https://www.gov.uk/government/publicat...
